عبد الرحيم بقادى يرثى نقد وحميد

يادنيا فعلاً
انت شينة وبنت كلب
يادنيا قاصدانا من دون سبب
حميد يادنيا مازولاً كعب
حميد ماجاب الشينة
ماتلجلج كضب
حميد ياضلالتنا
من حر اللهيب واللهب
حميد ركازتنا
لامن تهد من فرط التعب
حميد الانقى من عرق الدهب
ياهو زولنا فى الزمن الصعب
ياحميد اقيف
مالك بسراع مشيت
مالقول لسة ساكن فى كل بيت
مالصغار لسة ماكلين القوى
عند المبيت
لا حرف كسرة حار
لاقضمة رقيف
لا شاى لبن عند المغيب
لا لحسة جمادة من باقى الحليب
ياحميد اقيف
قبال جرحك يندمل
ويجف النزيف
انهد فوق راسنا
جبلا منيف
ومحمد سميك
فارقنا كانه طيف
نقد العفيف
نقد الشفيف
واحد من كل سيف
زمان فى عام واحد وسبعين
فى زمن الخريف
لما المشانق منصوبة للاحرار
والرصاص فى الدروة ابشع عزيف
يوم قالولو الرفاق
جات .تارة بالولد العفيف

ما اتردد وقال لكن وكيف
بعد راشد والشفيع
وايضاً جوزيف
لما السفاح كان بلعلع
فى التلفاز والاذاعة
فى زمن التفلت والوضاعة
والوجوة كانت سمحة
غطتها البشاعة
الرجولة انقلبت بضاعة

ونقد المطلوب

فى كل ثانية وكل ساعة
ماخان مبادؤة الحرة باعة
ركز الولد مع الرفاق الاخرين
شالو الشيلة وادونا اليقين
البنيات تساما طابق طابقين
والبيان يتحدى المسافات والمنافى
وجانا فى جوة السجون

ياحميد اقيف
مالك بسراع مشيت
سايق معاك ابوحميد بعد فد يومين
يادنيا فعلا انت شينة وبت كلب
يادنيا صدرك حجرا اصم ام قلب